İTV AYB-DƏN İZAHAT TƏLƏB EDİB

14 may tarixində baş tutmuş final səsverməsi zamanı 3 ölkənin carçısı xalları açıqlamaq üçün yayıma alınmamışdı. Bu qalmaqaldan sonra AYB açıqlama verərək Azərbaycan da daxil 6 ölkənin səsvermə qaydasını pozduğunu, buna görə də xallarının silindiyini açıqlamışdı. Hadisədən dərhal sonra, Moldova, Ruminya və Gürcüstanın birinci kanallarından reaksiya gəlmişdi.

Respublikamızda yayım hüququna malik “İctimai Radio və Televiziya Yayımları Şirkəti” məsələ ilə bağlı Avropa Yayımları Birliyinə öz etirazını göndərib. Sitat:

“Avroviziya-2022” mahnı müsabiqəsinin final mərhələsi zamanı baş verənlər və ondan sonra verilmiş qərarlar Azərbaycan İctimai Televiziya və Radio Yayımları Şirkətində təəssüflə qarşılanıb.
Bəyan edirik ki, biz müsabiqə təşkilatçılarına azərbaycanlı münsiflərin səs verdiyi ölkələrin adlarını göndərmişdik. Həmin siyahıya əsasən, 12 bal Ukraynaya verilmişdi. Yarışma təşkilatçıları buna cavab olaraq, İctimai Televiziya və Radio Yayımları Şirkətinin nümayəndələrindən final şousunun sonunda heç bir səbəb gətirmədən israrla başqa nəticələrin açıqlanmasını istəyiblər. Biz bu istəyi qətiyyətlə rədd etmişik. Dərhal təşkilatçılara sorğu xarakterli rəsmi məktub göndərilib və canlı yayımda onlardan alınan nəticələrin deyil, bizim jürinin səslərini açıqlayacağımızı, bu məsələni isə ictimailəşdirəcəyimizi bildirmişik. Yalnız bundan sonra bizə cümə axşamı keçirilən yarımfinal mərhələsi zamanı 6 ölkənin, o cümlədən Azərbaycanın səsləri ilə bağlı müəyyən “qəribəliyin” olduğu barədə məlumat verildi. Qeyd edək ki, bu “qəribəlik”lə bağlı bizə cümə axşamından şənbə günü finalın sonuna qədər heç bir məlumat verilməyib, hansısa “sübutlar” indiyə qədər təqdim olunmayıb.
Yayım zamanı İctimai Televiziya və Radio Yayımları Şirkətinin nümayəndəsi Azərbaycanda münsiflərin səsverməsinin nəticələrini elan etməyə tam hazır olmasına baxmayaraq, yarış təşkilatçıları Bakıya bağlanmayıb, bizim adımızdan öz nəticələrini elan ediblər. Bu prosesin Bakıdan aparılmaması isə texniki problemlərlə əlaqələndirilib.
Halbuki bizdə səslərin canlı yayımda elan olunması üçün heç bir texniki problem yox idi. Bir daha vurğulayırıq ki, biz təşkilatçılara İctimai Televiziyanın adından səsləri elan etməyə heç bir hüquq verməmişik.
Biz bu məsələ ilə bağlı rəsmi cavab gözləyirik və ondan asılı olaraq növbəti addımlar atmağı planlaşdırırıq. Ümid edirik ki, yaranmış vəziyyət tezliklə ədalətin qorunması şərtilə çözüləcək.”

Qeyd edək ki, Gürcüstan, Ruminya və Azərbaycan canlı yayıma qoşulma anında xəbərdar olmuşdu hadisədən. Həmin ölkələrin xalları yaxın ölkələrin xallarına əsasən müəyyənləşdirilmişdir. Gürcüstan və Azərbaycanın verdiyi xallar tamamilə eyni olmuş, dəyişdirilmə səbəbindən Azərbaycan Gürcüstan münsiflərindən xal ala bilməmişdir. Digər ölkələr – San Marino, hələki susqundur, Polşa isə xallarının dəyişdirilmədiyini bildirmişdir.